Eksperti i merkatos, Nicolo Schira, raporton se Juventus i ka dërguar Lille ofertën e parë zyrtare për Edon Zhegrovën.
Bardhezinjtë i ofrojnë klubit francez 12 milionë euro plus bonuse për të lënë të lirë Zhegrovën. Ndërsa për lojtarin, një kontratë deri në vitin 2030 dhe rrogë vjetore 2.5 milionë euro.
Marrëveshja me lojtarin është thuajse e arritur, por mbetet të gjehet gjuha e përbashkët me Lille. Klubi francez kërkon 15-20 milionë euro për fantazistin e Kosovës, i cili ka hyrë në vitin e fundit të kontratës. Deri më 1 shtator, që është afati i fundit i merkatos, pritet të ketë “tym të bardhë” mes palëve dhe Zhegrova të transferohet në Torino.
Lille nuk mund të pengojë transferimin e tij drejt Juventus, duke ditur që mund ta humb si lojtar të lirë verën e ardhshme. Në rast transferimi te Juventus, Zhegrova do i bashkohej shokut të tij, Jonathan David, i cili u transferua si lojtar i lirë te bardhezinjtë pikërisht nga Lille, në fillim të merkatos.