Futbollisti legjendar i Partizanit dhe ish lojtari i seleksionit jugosllav, Xhevat Prekazi, ka pësuar goditje në tru dhe është shtruar me urgjencë në spitalin e Beogradit.
Prekazi ka pësuar sulm në tru afër Kopaonikut, ku ka një vilë, prej nga është dërguar me urgjencë në spital, transmeton Ballkani.info.
Aktualisht është në gjendje stabile, mëson Telegrafi serb.
Prekazi ka luajtur 153 ndeshje për Partizanin gjatë tetë sezoneve dhe ka shënuar 19 gola. Më pas ai luajti për Hajdukun nga Spliti dhe Galatasaray, ku kaloi gjashtë vjet dhe ndoshta pati periudhën më të mirë të karrierës së tij. Ai shënoi 40 gola në 185 ndeshje për gjigantët nga Stambolli dhe konsiderohet një emër i madh në Turqi.
Ai e përfundoi karrierën e tij si lojtar në Bakirkoyspor turke në vitin 1992.
Për vite me radhë ka punuar si skaut për Partizanin dhe për një kohë ka qenë asistent në kombëtaren e të rinjve të Serbisë në kohën kur ishte trajner Zvonko Zhivkoviq.
Prekazi nuk ka pranuar ta vizitojë Kosovën pas luftës, duke thënë se jetën e ka në Serbi. /Ballkani.info/