Leon Avdullahu do të paraqitet për Kosovën në të ardhmen. Ai ka vendosur ta përfaqësoj Kosovën, ka bërë të ditur të hënën mbrëma kryetari i Federatës së Futbollit të Kosovës, Agim Ademi. “Pritjes i erdhi fundi, Leoni është i Kosovës”, e ka nisur shkrimin kryetari Ademi në faqen e tij në facebook. “Ndjej kënaqësi të ndaj me ju lajmin e madh se Leon Avdullahu, i udhëhequr nga zemra e tij, ka vendosur që të luaj për Kombëtaren e Kosovës. Leoni më njoftoi sonte për vendimin e madh, që pason takimin që kishim pak kohë më parë kur edhe i kishim diskutuar të gjitha gjërat.
Leoni me këtë vendim dëshmoi edhe një herë fuqishëm që Kosova mbetet zgjedhje zemre dhe se identiteti e prejardhja nuk mohohen. Mirë se vjen Leon, le të nisim së bashku një rrugë të gjatë e të suksesshme për ekipin kombëtar të Kosovës dhe për Ty.
Të priftë e mbara me Kosovën!”, shkruan Ademi.
Avdullahu është 21-vjeçar. Ai së korrik iu bashkua ekipit elitar të Gjermanisë, Hoffenheim nga skuadra e Baselit. Avdullahu ka luajtur gjashtë ndeshje për U21 e Zvicrës. Ka luajtur edhe në grupmoshat tjera të shtetit helvetik.
Te Zvicra kishin pasur takim me Avdullahun javë më parë. Takimi ishte mbajtur për të bindur Avdullahun të mbetet pjesë e Zvicrës.