Klubet e Premier Ligës kanë shpenzuar një shifër rekord prej 1.95 miliardë funte në merkaton e kësaj vere, ndërsa ajo do edhe një javë për t’u mbyllur.
Sipas analizës së grupit të auditimit “Deloitte”, rekordi i mëparshëm prej 1.92 miliardë paundësh, i vendosur verën e kaluar, tashmë është thyer ende pa rënë gongu në 1 shtator.
“Ky nivel i bujshëm i shpenzimeve duket të jetë norma e re për klubet e Premier Ligës”, tha Kalum Ros, përfaqësues i “Deloitte”. Klubet do të thyejnë barrierën e 2 miliardë paundëve në ditët në vijim, shton raporti. “Për të dytin vit radhazi, shpenzimet e transferimeve verore nga klubet e Premier Ligës kanë thyer rekordin e mëparshëm dhe duket se do të kalojnë shifrën mbi 2 miliardë sterlina për herë të parë përpara se dritarja të mbyllet më 1 shtator”, shtoi Ros, i cili ka funksionin e zëvendësdrejtorit të “Deloitte”.
Asnjë transferim i Premier Ligës nuk arriti shifrën e 100 milionë paundëve verën e kaluar, por këtë vit Çelsi theu rekordin e transferimit më të shtrenjtë në Britani, kur transferoi Kaisedon nga Brajtoni, e cila bashkë me bonuset mund të arrijë shifrën e 115 milionë paundëve.