Edon Zhegrova mund të jetë një nga emrat më të përfolur të merkatos së verës, teksa një transferim i mundshëm i tij nga Lille drejt Napolit po përflitet gjithnjë e më shumë.
Sipas “Le Petit Lillois”, Lille është e gatshme të dëgjojë oferta për yllin kosovar, duke kërkuar rreth 20 milionë euro për kartonin e tij.
Zhegrova ka qenë jashtë fushave që nga dhjetori, për shkak të një lëndimi që e ka penguar të japë kontributin e tij në pjesën e dytë të sezonit.
Megjithatë, para lëndimit, ai kishte treguar formë të shkëlqyer dhe ishte ndër lojtarët më kreativë të skuadrës në krahun e djathtë të sulmit.
Napoli, i cili synon një rikonstruktim të sulmit për sezonin e ri, e sheh Zhegrovën si një profil ideal për të shtuar shpërthim dhe kreativitet në fazën ofensive.
Përveç aftësive të tij teknike dhe shpejtësisë, 25-vjeçari vlerësohet për fleksibilitetin dhe potencialin për të shkëlqyer në një kampionat si Serie A.
Megjithëse ende nuk ka një ofertë zyrtare nga Napoli, interesimi është konkret dhe pritet që bisedimet të intensifikohen në javët në vijim.
Nga ana tjetër, Lille nuk është kundër shitjes së Zhegrovës, sidomos nëse merr ofertën e kërkuar, pasi klubi synon të riorganizojë skuadrën për sezonin e ardhshëm.
Nëse transferimi realizohet, Zhegrova do të bëhej lojtari i radhës nga Kosova që luan në elitën e futbollit italian, duke shtuar një tjetër kapitull të rëndësishëm në karrierën e tij ndërkombëtare.