Albi Mall Superliga vazhdon me ndeshjet e xhiros së 14-të, ku dy të tjera janë në program për tu zhvilluar sot.
Në fakt ishte paraparë që të luhet edhe derbi mes Ballkanit dhe Prishtinës, por në fund FFK e shtyu atë për një kohë të papërcaktuar.
E ditën e sotme vëmendja e adhuruesve të futbollit kosovar do të jetë në Podujevë, ku pritet të zhvillohet derbi mes Llapit dhe Dritës.
Dy finalistët e Kupës së Kosovës kanë objektiva të ndryshme, me Llapin që kërkon një vend në Evropë dhe Dritën që synon ta rikthejë titullin e kampionit në Gjilan.
Vendasit vijnë në këtë takim pas dy humbjeve radhazi, derisa Drita pas fitores nga Ferizaj.
Të besuarit e Tahir Batatinës shpresojnë të rikthehen te rezultatet pozitive, në anën tjetër djelmoshat e Ardian Nuhiut kërkojnë ta përsëritin suksesin e 3 shtatorit ku mposhtën Llapin 4-0 në ndeshjen e rrethit të parë.
Duel shumë interesant pritet të zhvillohet edhe në stadiumin me bari sintetik në Gjilan, ku Gjilani është nikoqir i Dukagjinit të Klinës.
Ekipi bardhekuq synon të rikthehet te fitoret, derisa presin Dukagnin e motivuar pas fitores 0-1 në udhëtim te Llapi.
Të dyja sfidat e ditës së sotme në Albi Mall Superligë zhvillohen me fillim nga ora 13:00.