Suspendimi i tre futbollistëve të Kombëtares së Kosovës, Arjanet Muriç, Edon Zhegrova dhe Florent Muslija, ka hapur debat të gjerë në opinionin kosovar.
Një i tillë është zhvilluar edhe mbrëmë në emisionin “Sport show”, ku protagonistë ishin gazetari Arlind Sadiku dhe opinionisti Ardian Llumnica.
Sadiku, ka thënë se është dashur kjo çështje të mbahet e mbyllur dhe mos të vihet në publik.
“Nuk është dashur një vendim i tillë, por Federata ka dashur ta fsheh fajin e vet për humbjen dhe i ka suspendu këta, për mi gozhdu lojtarët. Kjo çështje është dashur të mbahet në heshtje dhe mos të merren vendime të tilla”, ka thënë, Sadiku.
Me këtë deklaratë nuk është pajtuar Llumnica, duke thënë se një skandal i tillë nuk mbahet i mbyllur.
“Nuk është në pyetje Edon Zhegrova, janë tre futbollistë që e kanë shkelur rregulloren. Sikur mos të kishte qenë Zhegrova në këtë situatë, Arlind Sadiku i pari e kishte qitur lajmin dhe e kishte cilësuar skandal. Nuk bën kështu, të gjithë aty duhet të jenë të barabartë”, ka thënë Llumnica, derisa Sadiku ni është kundërpërgjigjur.
“Në të kaluarën ka pasur futbollistë të tjerë që kanë dal dhe nuk janë dënuar, as kjo nuk është e drejtë”, ka vlerësuar Sadiku. /GazetaSport