Lorik Cana ka vizituar sot Komitetin Olimpik të Kosovës (KOK). Ai ishte i shoqëruar nga Jerian Lalaj, nga fondacioni “Lorik Cana 5”.
Legjenda shqiptare e futbollit dhe Lalaj u priten nga drejtuesit e KOK-ut, presidenti Ismet Krasniqi dhe sekretari i përgjithshëm, Besim Aliti.
Të dyja palët bashkëbiseduan për mundësitë e bashkëpunimit në projekte të ndryshme, me theks të veçantë aktivitetet sportive parashkollore në Kosovë.
Cana është edhe ambasador i “Grassroots” në Shqipëri.
Presidenti Krasniqi falënderoi Canën për vizitën dhe bashkëpunimin që ka me sportin në Kosovë dhe Shqipëri.
Ish-kapiteni i Kombëtares shqiptare përgëzoi presidentin Krasniqi për zyret e reja, derisa shprehu gatishmërinë për të mbështetur zhvillimin e mëtutjeshëm të sportit në vendin tonë. /Gazeta Express/
