Pasi e fitoi vendin e tretë në Botërorin e Katarit dhe të dytin në Kupën e Botës në Rusi, Dejan Lovren ka vendosur ta mbyllë eksperiencën e bukur me Kombëtaren kroate.
Mbrojtësi i Lyonit e ka zbuluar vendimin e tij sot përmes një letre të publikuar në rrjetet sociale.
“Nuk ishte një vendim i lehtë, por sot i them lamtumirë Kroacisë. Kam ëndërruar gjithmonë ta vishja këtë fanellë dhe nuk do ta harroj kurrë debutimin tim në Kombëtare në vitin 2009. Në pesë vjetët e fundit i kemi shkruar kapitujt më të bukur në historinë e Kroacisë. I falënderoj të gjithë trajnerët, shokët e skuadrës dhe tifozët”, ka shkruar ish-futbollisti i Liverpoolit.
33 vjeçari ka luajtur rol të rëndësishëm në sukseset e kroatëve, të cilët e fituan medaljen e argjendtë dhe atë të bronztë në dy Botërorët e fundit.