Malisheva e ka nisur me humbje minimale 1-0 aventurën e saj të dytë evropiane, në ndeshjen e parë ndaj Vikingur Reykjavik, të zhvilluar në stadiumin “Fadil Vokrri” në Prishtinë.
Skuadra e trajnerit Bekim Isufi pati një paraqitje dinjitoze, por u ndëshkua në sekondat e fundit të pjesës së parë, kur Nikolaj Hansen realizoi me kokë pas një harkimi nga goditja e lirë (45+1′). Gjatësia dhe përvoja e islandezëve u bë faktor në një moment vendimtar.
Pjesa e dytë solli më shumë rrezikshmëri nga Malisheva. Altin Aliu, Valmir Veliu, Donart Vitija dhe Laurent Xhylani kishin tentime për të barazuar, por mungoi konkretizimi.
Në mbrojtje, Dreni Kryeziu dhe Agon Xhaka shmangën disa rreziqe të mëdha, ndërsa portieri Ilir Avdyli bëri disa pritje vendimtare.
Ishte një përballje me pak fat për ekipin kosovar, i cili nuk shfrytëzoi rastet, ndërsa mysafirët treguan efikasitet.
Ndeshja e kthimit do të luhet pas një jave në Islandë, ku Malisheva do të kërkojë përmbysjen dhe kalimin tutje në Ligën e Konferencës.