Manchester City ka regjistruar fitoren e tretë radhazi për të vazhduar kështu me presionin mbi liderin e Premierligës, Arsenalin.
Kampioni në fuqi anglez triumfoi sonte në udhëtim kundër Crystal Palace, në ndeshjen e vlefshme për javën e 27-të.
Skuadra e drejtuar nga Pep Guardiola fitoi me rezultat minimal 0:1. Ndeshja u zhvillua në stadiumin “Selhurst Park”.
Golin e vetëm dhe të fitores për “Qytetarët” e shënoi sulmuesi i rrezikshëm, Erling Haaland, në minutën e 77-të nga penalltia.
Për norvegjezin ishte ky goli i tij i 28-të këtë sezon në elitën e futbollit anglez.
Manchester City pas kësaj fitore ka 61 pikë në pozitën e dytë në tabelë, tani me dy pikë më pak se Arsenali. “Topçinjtë” ndeshjen e kësaj jave e luajnë nesër, kundër Fulhamit.
Crystal Palace ndodhet në pozitën e 12-të me 27 pikë.