Manchester United është i parezistueshëm dhe i papërmbajtshëm në këtë sezon.
“Djajtë e Kuq” po luftojnë në katër fronte, në një sezon i cili deri këtu ishte jashtëzakonisht pozitiv për këtë ekip.
Me fitoren e pastër 3:0 ndaj Leicester Cityt në “Old Trafford”, gjiganti britanik e konsolidoi pozitën e tretë në tabelë dhe iu afrua komshinjve të Man Cityt, të cilët tash janë përpara veç tri pikë.
Lideri Arsenal është vetëm pesë pikë përpara, por e ka një lojë më pak të zhvilluar.
E kur ta mendojmë që fillimi i sezonit për United ishte i tmerrshëm me humbjen në shtëpi nga Brightoni dhe me humbjen shkatërrimtare nga Brentfordi, 0:4 në udhëtim.
Sidoqoftë, besimi në trajnerin Erik ten Hag është shpaguar dhe nga humbja prej Aston Villës më 6 nëntor, Man Utd praktikisht nuk është ndalur kurrë: 8 fitore dhe një humbje në 9 ndeshjet pasuese të kampionatit.
Protagonist i madh i ekipit në ndeshjen e fundit me dy gola ishte Marcus Rashford, i cili po kalon nëpër një formë jetësore.
Sulmuesi anglez i ka realizuar 14 gola në Premierligë në këtë edicion, e në total 24 gola, aq sa i kishte realizuar Cristiano Ronaldo në sezonin e kaluar kur ishte në top-formë.
Krahas Premierligës, ekipi nga “Teatri i Ëndrrave” është në garë edhe për tre trofe të tjerë.
Angazhimin e radhës do të ketë në Ligën e Evropës, ku do të përballet në shtëpi me Barcelonën më 23 shkurt, derisa loja e parë në “Camp Nou” kishte përfunduar 2:2 javën e kaluar.
Më pas, ekipin e Ten Hag e pret finalja e Carabao Cup kundër Newcastlet më 26 shkurt, kurse më 1 mars do të përballet me West Ham United në të tetën e finales së FA Cup.
United synon ta mbyllë me trofe të rëndësishëm këtë sezon.