Lothar Matthäus nuk ka bërë kurrë lëshime për askënd, as në fushë dhe as jashtë saj. E konfirmimi erdhi pas dhënies së çmimit “Lojtari më i mirë i meshkujve FIFA 2023” për Lionel Messi. Një nominim që ishte në ajër prej kohësh, por që nuk i ka pëlqyer fare ish-futbollistit të Bayern Munich.
Matthäus nuk i kurseu kritikat kur foli për Sky Deutschland: “Nëse shikoni sukseset e mëdha, nuk ka mënyrë për ta anashkaluar Manchester City. E në rastin e lojtarit më të mirë zgjedhja duhej të binte mbi Erling Haaland. Ai ka fituar tituj më të rëndësishëm me City dhe përqindja e golave të tij është mbresëlënëse, diçka vendimtare për këtë trofe”.
Messi përfundoi në nivel të barabartë pikësh me sulmuesin e Manchester City, Erling Haaland në votimin e FIFA-s. Argjentinasi, sidoqoftë, mori çmimin e parë falë më shumë vendesh të para (5 pikësh) të dhënë nga kapitenët e ekipeve kombëtare. Ish-kapiteni i Gjermanisë, Matthaus, mendon se një qëndrim i tillë është i pamerituar, duke thënë për Sky Deutschland: “Ai nuk mund të jetë fituesi këtë herë. Mendoj se ai ishte futbollisti më i mirë i 20 viteve të fundit, por ai ka qenë në Paris dhe te Miami, ku tani po krijon një zhurmë dhe nuk ka fituar asnjë titull të madh”.