Në një intervistë për ‘Sport Bild’, Kylian Mbappé foli për ambiciet e Bluve për ‘Euro 2024’, në veçanti duke dhënë pikëpamjen e tij për ekipin gjerman.
“Ne kemi ardhur në Gjermani për të bërë histori”,- tha Kylian Mbappé në një intervistë të publikuar nga ‘Sport Bild’ pak ditë para fillimit të ‘Euro 2024’ (14 qershor-14 korrik).
“Është puna jonë. Ne jemi gati, jemi të uritur për sukses dhe e dimë se çfarë duhet të bëjmë. Mund të bëjmë diçka të mirë për vendin tone, nëse e sjellim kupën në shtëpi”, shtoi kapiteni i ekipit francez, ndërsa saktësoi se “ambiciet e mëdha” të Bluve u kombinuan me “shumë përulësi”, sipas transkripteve të ‘Sport1’ dhe ‘RND’.
Kur u pyet nëse do të dëshironte të përballej me Gjermaninë në finale, Kylian Mbappé u përgjigj pozitivisht: “Unë do të firmosja për këtë”. Dhe kjo pavarësisht dy humbjeve të fundit kundër Mannschaft, marsin e kaluar në Lyon (0-2) dhe në shtator 2023 në Dortmund (2-1).
“Ndeshjet miqësore nuk llogariten! Më seriozisht, Gjermania ka një ekip të mrekullueshëm. Në parim, gjermanët janë gjithmonë aty kur diçka është në rrezik. Ata kthehen gjithmonë pas një pengese,”- komentoi sulmuesi i ri i Real Madridit.
‘Euro 2024’ do të fillojë me Gjermani-Skoci në ndeshjen hapëse në Mynih, këtë të premte më 14 qershor (21:00). Franca hyn në garë të hënën më 17 qershor kundër Austrisë (21:00), në Grupin D.
Në varësi të rezultateve të tyre, Franca dhe Gjermania do të mund të takohen më shpejt në çerekfinale (5 dhe 6 korrik). Nëse të dy kombet përfundojnë në krye të grupit të tyre, një përballje do të jetë e mundur vetëm në finale, në Olimpiastadion të Berlinit. /Ballkani.info