Klubi mitrovicas Trepça ’89, më 15 nëntor, saktësisht në ditëlindjen e tij do ta bëjë përurimin e shtatores së futbollistit tashmë të ndjerë, Erion Kajtazi.
Shtatorja do të vendoset tek stadiumi me bari sintetik afër liqenit akumulues, ku siç dihet kjo fushë e futbollit mban emrin “Erion Kajtazi”.
Ceremonia e zbulimit të shtatores do të fillojë nga ora 12:00.
17-vjeçari ka ndërruar jetë në dhjetor të vitit të kaluar.
Talenti i madh i futbollit kosovar ka qenë duke luajtur në ndeshjen A&N – Trepça’89, në kuadër të Superligës në kategorinë e juniorëve, kur në një moment ka rënë pa vetëdije në fushë.
Erioni nuk ka dhënë shenja jete dhe është konstatuar vdekja e tij nga ataku kardiak.
Ai është konsideruar një ndër futbollistët më premtues në Kosovë derisa ka qenë pjesë edhe e grupmoshave të reja të Kosovës.
Njoftimi pa ndërhyrje i Trepçës ’89:
Nën patronatin e Presidentit të KF Trepça’89 FC z. Abedin Zeka dhe me iniciativën e klubit dhe familjes Kajtazi, me datën 15 nëntor, saktësisht në ditëlindjen e tashmë të ndjerit
Erion Kajtazi:
Do të vendoset Shtatorja tek stadiumi me bari sintetik afër Liqenit Akumulues, ku siç dihet kjo Fushë e Futbollit mban emrin ERION KAJTAZI.
Ceremonia e zbulimit të Shtatores do të fillojë nga ora 12:00 dhe ftohen të gjithë të interesuarit të marrin pjesë dhe të madhështojnë këtë ngjarje.