Ermal Krasniqi do të jetë transferimi më i ri i CFR Cluj, kanë raportuar mediat rumune të dielën dhe të hënën (sot).
Sipas mediumit “sport.ro”, sulmuesi i Ballkanit do të nënshkruajë kontratë katër vjeçare e gjysmë me një nga klubet më të trofeshme rumune.
“CFR Cluj transferoi një lojtar nga një ish-kundërshtar në Ligën e Konferencës. Krasniqi, i cili kishte hyrë në gjashtë muajt e fundit të kontratës me Ballkanin, nënshkroi kontratë të vlefshme për katër sezone e gjysmë me ata të CFR Cluj”, raporton mediumi në fjalë, transmeton Demokracia.com.
“Digisport.ro”, gazeta tjetër rumune gjatë raportimit për lëvizjet e merkatos tek Cluj e ka përmendur edhe Ermal Krasniqin.
“Cluj ka përgatitur edhe lëvizje të tjera, si për shembull futjen e mesfushorit Ermal Krasniqi (24 vjeç), nga ish-kundërshtari në grupet e Konferencës së Ligës, Ballkani”, thuhet në artikullin e kësaj gazete.
24-vjeçari nuk është emër i panjohur për klubin rumun.
Krasniqi është paraqitur me Ballkanin në fazën e grupeve në Ligën e Konferencës pikërisht edhe kundër Cluj.
Ermal Krasniqi është ndër talentët më të mirë të futbollit në Kosovë aktualisht.