“Granit Xhaka dhe Xerdan Shaqiri po vijnë në Serbi!”, kështu e nis shkrimin portal serb Kurir.rs, transmeton GazetaSport.info.
Ata do të luajnë kundër Bjellorusisë të shtunën më 25 mars në stadiumin “Karaxhorxhe” në Novi Sad, në kuadër të eliminatoreve për Kampionatin Evropian.
“Granit Xhaka dhe Xherdan Shaqiri ishin gjithmonë të prirur për manipulime dhe shaka kur luanin kundër Serbisë. Kështu ndodhi në ndeshjene fundit në Kupën e Botës në Katar dhe pesë vjet më parë në Kupën e Botës në Rusi”, vazhdon shkrimin ky portal nacionalist duke bërë thirrje në njëfarë forme për presion ndaj dyshes shqiptare që luajnë në fanellën e Zvicrës.
Xhaka e Shaqiri ndonëse luajnë për Zvicrën, ata asnjëherë nuk e kanë fshehur identitetin e tyre kombëtare dhe gjithmonë me krenari kanë treguar se vijnë nga Kosova dhe kjo sikur I pengon tejmase serbët.
Trajneri i Zvicrës, Murat Jakin, së shpejti do të shpallë listën e futbollistëve që po i llogarit në ndeshjet kualifikuese për Kampionatin Evropian ndaj Bjellorusisë dhe Izraelit. Sigurisht që në të pritet të jenë Granit Xhaka dhe Xherdan Shaqiri, të cilët janë ndër lojtarët më të mirë të skuadrës së tyre.
Për shkak të sanksioneve të UEFA-s, bjellorusët zgjodhën t’i zhvillojnë ndeshjet e tyre në Serbi, në Novi Sad, pa praninë e tifozëve.
Ndeshja ishte e mbyllur për të gjithë publikun me vendim të UEFA-s, ndaj akreditimi nga gazetarët nuk është i mundur. Policia do të jetë rreth stadiumit dhe do të parandalojë çdo grumbullim pranë objektit “Karagjorgje”.
Zviceranët do të mblidhen të hënën, në qendrën stërvitore të klubit të futbollit Bazel dhe më pas do të kenë një zonë tifozësh për tifozët dhe mediat. Ndeshja kundër Bjellorusisë është planifikuar për më 25 mars, ndërsa ardhja në Serbi është planifikuar dy ose një ditë më herët.