Lionel Messi e ka arritur shifrën e 800 golave në karrierë.
Shtatë herë fituesi i Topit të Artë shënoi mbrëmë në fitoren 2:0 ndaj Panamasë në një ndeshje miqësore.
Messi me shokë u pritën si mbretër në atdhe pasi e zhvilluan lojën e parë pas triumfit në Kupën e Botës, shkruan “Gazeta Express”.
Ai e çoi stadiumin në trans duke shënuar gol spektakolar nga gjuajtja e lirë.
Kështu, argjentinasi e shënoi golin e 99-të me Kombëtaren e Argjentinës dhe synim i radhës është që ta arrijë shifrën jubilare prej 100 golash me “Albiceleste”.
Ndërkaq, në nivelin e klubeve, Messi i ka shënuar 701 gola, përfshirë këtu 493 në ligat nacionale.
Leos i nevojiten veç edhe dy kontribute (gol ose asistim) në nivel të klubeve, për t’u bërë lojtari i parë që arrin në shifrën e 1000 kontributeve në gola.
Sa i përket totalit të golave, Leo Messi e sheh veten në pozitën e dytë me 800 gola, prapa Cristiano Ronaldos, i cili i ka 830 gola.
Ylli portugez, nga ana e tij, mbrëmë i shënoi dy gola në ndeshje me Lihtenshtajnin, shkruan “Gazeta Express”.
Me këtë rast, “CR7” u bë lojtari me më së shumti paraqitje në histori të Kombëtareve.
38 vjeçari i ka zhvilluar 197 ndeshje me Portugalinë dhe e la prapa rekordmenin e deritashëm, Bader Al-Mutawa. /Gazeta Express/
