Lionel Messi i kërkoi “ndihmë” legjendës së Argjentinës, Diego Maradonas përpara goditjes vendimtare të penalltisë në finalen e Kupës së Botës “Katari 2022” ndaj Francës.
Argjentina triumfoi me penallti kundër Francës për ta fituar titullin e parë të botës që nga viti 1986 kur Maradona frymëzoi fitoren e tyre në Meksikë.
Messi bëri të njëjtën gjë të dielën, duke shënuar dy gola në finale dhe duke qenë i saktë nga penalltia. Një video që është bërë virale në rrjetet sociale tregon Messin duke thirrur Maradonën përpara gjuajtjes vendimtare të penalltisë nga Gonzalo Montiel.
“Hajde Diego nga qielli” tha Messi duke shikuar lart në qiell përpara se të shpërthejë në festë.
Edhe djali i Maradonas, e festoi fitoren e Argjentinës dhe lavdëroi Messin, duke thënë se askush nuk e meriton këtë sukses më shumë se ai.