Lionel Messi ishte njeriu i natës së mbrëmshme.
Ylli argjentinas e inspiroi Inter Miamin drejt fitores ndaj Orlando Cityt në Kupën e Ligës në Shtetet e Bashkuara të Amerikës.
36 vjeçari i realizoi dy gola, në secilën pjesë nga një dhe me të dyja këmbët nga një, për t’ia siguruar një fitore të re ekipit nga Florida.
Kështu, ish-futbollisti i Barcelonës dhe i Paris Saint-Germainit arriti në kuotën e 5 golave në 3 ndeshje me fanellën e ekipit amerikan.
E pas ndeshjes së mbrëmshme, përfaqësuesi argjentinas e ka bërë një postim në rrjetet sociale duke e shprehur gëzimin dhe lumturinë për momentin që po e kalon dhe për fitoren e radhës së ekipit të tij.
“Ndeshje e madhe e të gjithëve, mjaft i lumtur për fitoren. Natën e mirë, Miami!!!”, ka shkruar kampioni i botës me Argjentinën.
Messi i dha fund eksperiencës së gjatë evropiane pak javë më parë kur iu bashkua ekipit nga liga MLS, ku do t’i kalojë i qetë dhe pa presion vitet e fundit të karrierës.
E në Amerikë tifozët kanë nisur të dashurohen menjëherë në shtatë herë fituesin e Topit të Artë.