Rafael Leao u shpall lojtari më i mirë i ndeshjes Napoli-Milan (1-1). Portugezi “shpiku” golin e kuqezinjve me një inkursion fantastik ku dribloi çdo kundërshtar që i doli përpara.
Në prononcimin pas ndeshjes, ylli i skuadrës së Stefano Piolit shprehu gjithë lumturinë e tij për kualifikimin në gjysmëfinalet e Champions League. Leao u ndal edhe te rinovimi, duke gëzuar tifozët.
“Jam i lumtur që jam pjesë e Milanit, është krenari të veshësh këtë fanellë. Të gjithë më ndihmojnë çdo ditë që të bëhem futbollist më i mirë. Dua të falënderoj skuadrën dhe trajnerin tim.
Jam i vetëdijshëm që kam shkruar një faqe historie. Në të ardhmen dua të vazhdoj të ëndërroj si të gjithë lojtarët e tjerë të Milanit. Jemi një hap larg nga fitimi i Champions League, duhet të përpiqemi deri në fund.
Çdo ndeshje përpiqem të dribloj kundërshtarët. E kam këtë cilësi të veçantë, me të cilën përpiqem të bëj diferencën. Milani është shtëpia ime.
A dua të qëndroj? Po, por duhen sistemuar disa gjëra. Gjëja më e rëndësishme është që jemi në gjysmëfinale. Dua të vazhdoj të ndihmoj skuadrën”, u shpreh 23-vjeçari portugez.