Tjetër fitore bindëse për Milanin në këtë fillim sezoni në Serinë A. “Djalli” mposhti thellë 4-1 Torinon në “San Siro” dhe ngjitet në krye të klasifikimit me pikë të plota dhe me golaverazhin e thellë 6-1 (fitoi 0-2 në fushën e Bolognas në javën e parë).
Dygolësh Oliver Giroud, që u tregua “i ftohtë” nga pika e bardhë e penalltisë në dy raste (të konfirmuara nga sistemi VAR).
Gjen për të dytë ndeshje radhazi rrugën e rrjetës edhe Pulisic, ndërsa Theo Hernandez realizoi me mjeshtëri me instiktin e një sulmuesi të madh, duke e kaluar topin mbi portierin.
Katër gola në fundin e pjesës së parë në “San Siro”, në sfidën mes Milanit dhe Torinos. Në të 33-tën, pas një kundërsulmi të shpejtë të kuqezinjve, Loftus-Cheek, pasi shpërtheu nga e djathta, pasoi në qendër për Pulisic, që e pati të lehtë ta shtynte topin drejt rrjetës.
Vetëm tri minuta më vonë erdhi barazimi i Torinos me Schuurs, pas një shpërqendrimi të mbrojtjes së Milanit, 1-1.
Reagimi i Milanit që i menjëhershëm. Kryesori sinjalizoi nga pika e bardhë e penalltisë për prekje të topit me dorë pasi u konsultua me sistemin VAR. Ekzekuton saktë Giroud, 2-1.
Por nuk përfundon me kaq pjesa e parë. Kombinojnë saktë Leao e Theo Hernandez, me francezin që e ngre me mjeshtëri topin mbi portierin Milinkovic-Savic.
Milani nuk mjaftohet me rezultatin e pjesës së parë. Në të 62-tëm kryesori akordon 11-metërsh për kuqezinjtë, pas ndërhyrjes së gabuar ndaj Leaos. Sërish godet saktë Giroud, 4-1.