Sulmuesi i skuadrës së Mallorcas, Vedat Muriqi, dhe ai i Real Sociedadit, Mikel Oyarzabal, do të jenë protagonistët kryesorë të duelit të xhiros së 10-të në La Ligën spanjolle, ka shkruar transmetuesi televiziv “DAZN” të enjten gjatë ditës.
Sociedadi dhe Mallorca ballafaqohen mes vete të shtunën nga ora 14:00, në kuadër të xhiros së 10-të të kampionatit spanjoll.
“Dy protagonistët kryesorë të ndeshjes janë Mikel Oyarzabal dhe Vedat Muriqi, sulmuesit e të dyja ekipeve që janë në formë të lartë para këtij dueli. Oyarzabal ka shënuar në tri ndeshjet e fundit të Real Sociedadit, kurse Muriqi ka shënuar në katër ndeshje prej pesë të fundit për skuadrën vizitore”, ka shkruar ndër të tjera faqja zyrtare e “DAZN”.
Jude Bellinghami është golashënuesi më i mirë në ligë aktualisht me tetë gola.
Robert Lewandowski, Joselu, Takefusa Kubo i Sociedadit, Bryan Zaragoza dhe Alvaro Morata janë me pesë gola, ndërsa Vedat Muriqi, sulmuesi i Kosovës, ka katër gola e dy asistime në La Liga këtë edicion me Mallorcan.
Muriqi ishte i ftuar për dy ndeshjet e tetorit të Kosovës në kualifikime të “Euro 2024”.
Për duelin kundër Andorrës ishte i suspenduar dhe nuk luajti, kurse dueli me Izraelin është shtyrë nga UEFA.
Muriqi është një prej lojtarëve më të rëndësishëm te Kosova. Në 46 paraqitje ka 24 gola të realizuar.