Sulmuesi Victor Osimhen pritet t’i bashkohet Paris Saint-Germainit gjatë verës së këtij viti, ndërsa vendin e tij te Napoli mund ta zë një sulmues shqiptar. Menaxheri shqiptar Serxhio Mezi në një intervistë për një radio italiane ka thënë se Napoli është mes sulmuesit të Shqipërisë, Armando Brojës, dhe sulmuesit të Kosovës, Albion Rrahmanit.
“E di që Napoli është i interesuar për Rrahmanin. Për më tepër, kontaktet kanë nisur Brojën. Megjithatë shumë do të varet nga zgjedhja e lojtarit. Broja u kontaktua nga drejtori i Napolit”, ka thënë Mezi.
Albion Rrahmani po shkëlqen këtë edicion në Rumani. Ai ka shënuar 17 gola dhe ka bërë 4 asistime në 23 paraqitje. Ai verën e shkuar iu bashkua Rapidit nga Ballkani i Suharekës për 600 mijë euro dhe ka kontratë deri në vitin 2026. Te Rapidi kërkojnë 10 milionë euro për kartonin e Rrahmanit. Më herët është raportuar se për Rrahmanin interesim kanë shprehur edhe Aston Villa, Werder Bremeni e Benfica.
Ndërkohë Broja, i cili është i huazuar te Fulhami, me Chelsean ka kontratë deri në vitin 2028. Këtë sezon, pas kthimit nga lëndimi i rëndë, ka luajtur pak minuta.