Liga e Kampioneve rikthehet sonte me dy përballje spektakolare të çerekfinales, ku gjithçka mbetet e hapur.
Barcelona dhe Liverpooli do të mundohen t’i përmbysin humbjet me rezultat identik 0:2 nga ndeshjet e para, përballë Atletico Madridit dhe Paris Saint-Germain, në një mbrëmje që premton emocione të mëdha dhe dramë deri në fund.
Atletico Madrid – Barcelona: Mision i vështirë për katalunasit në “Metropolitano”
Barcelona udhëton në Madrid me një objektiv të qartë: përmbysjen e disavantazhit nga ndeshja e parë. Një sfidë që premton intensitet maksimal, duke qenë se përballjet mes këtyre dy skuadrave këtë sezon kanë qenë të shpeshta dhe gjithmonë të luftuara.
Atletico vjen me avantazhin e dy golave dhe mbështetjen e publikut vendas, ndërsa trajneri Diego Simeone pritet të mbështetet te organizimi defanziv dhe kundërsulmet e shpejta, shkruan “Gazeta Express”.
Kapiteni i ekipit madrilen, Koke ka theksuar rëndësinë e ndeshjes: “Është një javë vendimtare për ne. Duam ta arrijmë gjysmëfinalen dhe jemi plotësisht të fokusuar.”
Nga ana tjetër, trajneri i Barçës, Hansi Flick beson ende te rikthimi, duke u mbështetur te cilësia sulmuese e ekipit të tij.
Kartoni i kuq i Pau Cubarsit ndryshoi gjithçka në lojën e parë.
Atletico e synon gjysmëfinalen e parë të Championsit pas rreth 9 vitesh. Të dy skuadrat kanë prodhuar shpesh gola në përballjet direkte këtë sezon.
Përmbysja mbetet e vështirë, por jo e pamundur për Barcelonën, e cila do të mundohet të sulmojë qysh në fillim dhe ta shfrytëzojë cilësinë e lojtarëve si Leëandoëski dhe Yamal.
Ndërsa Atletico do të kërkojë ta administrojë rezultatin dhe të godasë në kundërsulm.
Liverpool – PSG: “Anfield” kërkon një tjetër mrekulli evropiane
Në “Anfield”, Liverpooli do të përballet me një mision të ngjashëm: përmbysjen e disavantazhit 0-2 ndaj kampionëve të Evropës në fuqi, Paris Saint-Germain.
Skuadra e Arne Slot u dominua në ndeshjen e parë në Paris, ku PSG-ja ishte shumë më e rrezikshme dhe konkrete në fazën sulmuese.
Trajneri Arne Slot është optimist para lojës: “Nëse e bëjmë një paraqitje perfekte, gjithçka është e mundur”, theksoi ai.
Ndërkohë, Luis Enrique e ka paralajmëruar skuadrën e tij që të ketë kujdes nga “Të Kuqtë”, të cilët dinë të bëjnë rikthime të mëdha.
Në lojën e parë, Liverpooli nuk e realizoi asnjë goditje në portë. Por, “The Reds” janë të frikshëm në shtëpi pasi i kanë shënuar 2+ gola në 36 nga 50 ndeshjet e fundit në shtëpi.
Nga ana tjetër, PSG-ja i ka fituar disa ndeshje radhazi jashtë shtëpisë së vet pa pësuar gol.
PSG konsiderohet favorit për kualifikim me rreth 60% shanse.
Sidoqoftë, atmosfera e “Anfield” mund të jetë faktori vendimtar për Liverpoolin.
Ndërsa, PSG-ja do të mbështetet te kundërsulmet dhe forma e lojtarëve ofensivë si Kvaratskhelia.
Pra, do të jenë dy ndeshje me dy histori të njëjta: skuadra të mëdha në kërkim të përmbysjes përballë rivalëve që e kanë marrë nga një avantazh të rëndësishëm në takimet e para.
Barcelona dhe Liverpooli duhet të rrezikojnë gjithçka, ndërsa Atletico Madrid dhe PSG janë vetëm një hap larg gjysmëfinales.
Një mbrëmje ku Champions League premton spektakël të garantuar.