Edhe pse pritej që ndeshja e parë e plejofit të Superligës së Kosovës në basketboll të zhvillohet në Pejë, do të luhet në Mitrovicë.
Kështu, ka vendosur Komisioni Arbitrar i Federatës së Basketbollit të Kosovës (FBK) pas ankesës së Trepçës. Në këtë seri finale, do të përballet Trepça me Pejën, ndërsa ekipi që shënon tri fitore do të shpallet kampion i këtij edicioni. Trepça është ankuar të hënën në Komisionin Arbitrar, i cili ka anuluar vendimin e Komisionit të Garave që në të njëjtën ditë ka bërë caktimin e kalendarit të zhvillimit të ndeshjeve të serisë finale të plejofit.
“Vendoset që përparësinë e terrenit vendas në finalen e plejofit ta ketë KB Trepça. Urdhërohet Komisioni i Garave të caktojë kalendarin e zhvillimit të finaleve konform këtij vendimi”, thuhet ndër të tjera në vendimin e Komisionit Arbitrar të FBK-së.
Trepça e ka mbyllur sezonin e rregullt në pozitën e katërt në tabelë, ndërsa Peja doli e dyta. Peja garat e plejofit i ka nisur prej serisë gjysmëfinale, ku ka eliminuar Golden Eagle Yllin, ndërsa Trepça ka startuar prej çerekfinaleve.
Në serinë çerekfinale e eliminoi Bashkimin, përpara se në finale ta eliminojë edhe Sigal Prishtinën.