Më 18 dhjetor 1991, kriminelët serbë kanë vrarë në vendbanimin kroat, Jesenice, shtatë civilë. Në mesin e tyre ishte edhe gjyshi i kapitenit të Kroacisë, Luka Modriq. 31 vjet më vonë, në atë datë do të luhet finalja e Kupës së Botës në futboll. Tifozët e shumtë të Kroacisë, edhe ata në Kosovë, shpresojnë se përfaqësuesja kroate të jetë në finale. “Kjo e ka shënuar jetën time. Edhe pse isha djalosh i vogël, mbaj mend disa gjëra.
Gjyshi ishte mbrojtësi im dhe gjithnjë më ka mbajtur afër, edhe kur i qonte delet në kullotë. Emrin e kam prej tij. Më vjen keq që nuk ka përjetuar një pjesë të asaj që kam arritur. Por jam i sigurt që më shikon nga lartë dhe se është krenar”, ka thënë Modriq më herët për FIFA-n.
Sajti 24sata.hr, ka shkruar të dielën mbrëma për përvjetorin e vrasjes së gjyshit të lojtarit më të mirë kroat. “Nuk ishte e lehtë. Sirena, granata, jeta si refugjat. Por kur shikoj fotografitë e fëmijërisë jam gjithnjë me topin. Kjo ishte ikje prej gjithë asaj që ndodhte rreth nesh”, ka theksuar Modriq.