Federata e Futbollit e Zvicrës ka marrë mesazh të fortë pas vendimit të Leon Avdullahut për t’u paraqitur për Kosovën. Avdullahu ka zgjedhur Kosovën para Zvicrës. Ai kishte luajtur për grupmoshat e reja të Zvicrës. Të hënën u njoftua se në të ardhmen Avdullahu do të paraqitet për Kosovën.
Në Zvicër shkruajnë se edhe mbrojtësi Albian Hajdari po shqyrton mundësinë e ndryshimit të përfaqësueses. Ai ka debutuar në mars për Zvicrën kundër Luksemburgut.
“Thuhet gjithashtu se Albian Hajdari po shqyrton mundësinë e një kalimi në një vend tjetër. Qendërmbrojtësi 22-vjeçar nuk është vetëm shok me Leon Avdullahun. Ata kanë luajtur së bashku në akademinë e të rinjve të Baselit dhe në ekipin U21 të Zvicrës. Ata janë bërë përsëri shokë skuadre që nga e hëna, kur Hajdari u transferua nga Lugano te Hoffenheimi”, ka shkruar mediumi zviceran “Tages-Anzeiger”.
“Klubi i Bundesligës krenohet po ashtu me sulmuesin premtues, Fisnik Asllani. Ai zgjodhi Kosovën në vend të Gjermanisë një vit më parë. Natyrisht, shembulli i tij, ashtu si ai i Avdullahut, po ndikon edhe te Hajdari. Zviceranët duhet të jenë të shqetësuar”.
Tutje mediumi zviceran ka shkruar se do të ishte zhgënjyese nëse edhe Hajdari ndërron përfaqësuese.
Hajdari ishte ftuar te Zvicra edhe për dy ndeshjet e Ligës së Kombeve në nëntor të vitit të kaluar, ndaj Serbisë dhe Spanjës. Por, nuk luajti. Nëse do të luante, nuk do të kishte mundur të ndërronte përfaqësuesen. Por luajti vetëm në ndeshje miqësore dhe mund të paraqitet për përfaqësuese tjetër.