Garat e Formula 1 janë bërë tërheqëse për të ftuar të shumtë VIP nga fusha të tjera sportive apo sociale.
Kështu, në garën për Çmimin e Madh të Spanjës në Barcelonë janë parë futbollistë të shumtë, këngëtarja Shakira dhe dhjetëra personazhe të tjerë të famshëm nga bota e muzikës, modës dhe argëtimit.
Megjithatë, drejtuesit e këtij sporti do të vendosin kufizime rigoroze në të ardhmen për sa i përket numrit të atyre që do të marrin leje VIP dhe për këtë “përgjegjës” është Neymar.
Futbollisti i njohur ka shkaktuar një incident në Barcelonë, pasi pas sinjalit për xhiron e ngrohjes, ai nuk është larguar nga pista, por ka mbetur në këmbë në bar, pikërisht pranë pistës, duke rrezikuar kështu si drejtuesit, ashtu edhe veten.
Shefi i Formula 1 Stefano Domenicali njoftoi pas garës se tashmë po merren masa që një situatë e tillë të mos përsëritet më.