Klubi i futbollit Gjilani ka bërë të ditur sot se drejtimin e klubit e kanë marrë disa afaristë të njohur, në krye me Afrim Veliun.
Veliu do të jetë president i klubit dhe përfaqësues i katër aksionarëve tjerë të klubit: Fatlum Pireva, Qëndrim Demiri, Valmir Emini dhe Shaban Bajrami.
Veliu është një arkitekt i njohur, i cili veprimtarinë e tij biznesore e zhvilluar jashtë vendit, kryesisht në Zvicër dhe në Austri. Nën pronësinë e tij, Veliu ka një kompani të njohur arkitekturore, Velarch GmbH.
Sikurse Veliu edhe Qëndrim Demiri e Valmir Emini veprimtarinë e tyre e kanë zhvilluar në Zvicër. Demiri është pronar i një kompanie të njohur, “Demiri Gartenbau”, që merret me rregullimin e kopshteve, ndërsa Emini punon si shitës në një autosallon të veturave në Zvicër.
Ndryshe nga aksionarët tjerë të klubit, Fatlum Pireva veprimtarinë e tij biznesore e ka zhvilluar në Kosovë. Ai është afarist i njohur, nën pronësinë e të cilit ndodhet kompania “EL-BAU” SH.P.K.
“EL-BAU” është një kompani e njohur në Kosovë që merret me ndërtimin e rrugëve dhe objekteve banesore.
Gjilani kishte mbetur pa pronarë pas dorëheqjes së Florim Zukës nga posti i presidentit të klubit. Nga klubi ishin larguar shumë futbollistë, por Gjilani ka bërë disa përforcime të reja.
Pas dy ndeshjeve të zhvilluara, Gjilani ka një pikë dhe ndodhet në pozitën e tetë në tabelën e Superligës së Kosovës.