Drita është mbajtur në pjesën e parë, por jo edhe në të dytë. Kampionia e Kosovës në futboll e humbi 2:0 ndeshjen e parë të raundit të dytë kualifikues të Ligës së Kampionëve.
Të martën mbrëma, Drita u mposht nga kampioni danez, Copenhageni. Ndeshja u zhvillua në stadiumin “Parken” në Kopenhagë.
Pjesa e parë e ndeshjes përfundoi 0:0.
Në minutën e 67-të mbrojtësi i Dritës, Raddy Ovouka shkaktoi penallti. Në fakt arbitri tregoi në pikën e bardhë për një ndërhyrje për një veprim jo shumë të ashpër të Ovoukas. I saktë nga pika e bardhë ishte Magnus Mattsson. Ai shënoi për 1:0 në minutën e 69-të.
Pak minuta pas golit të parë, Ovouka bëri një ndërhyrje të rrezikshme në Mattssonin. Vendasit kërkuan penallti, por arbitri vlerësoi se loja duhet të vazhdojë. Ndërkohë u sinjalizua nga VAR-i. Pas rishikimit të situatës dha tjetër penallti për Copenhagenin.
Sërish përgjegjësinë e mori Mattsson. Ai gjuajti në krahun tjetër të portës dhe mposhti për herë të dytë Faton Malokun. Goli i dytë i gjigantit danez u shënua në minutën e 76-të.
Danezi Mattsson në lojë hyri në minutën e 68-të, por e vendosi sfidën me dy penallti të realizuara.
Në pjesën e dytë Copenhageni, ashtu si pritej, kishte iniciativën e plotë. Rreshtoi rastet, por shënoi vetëm nga penalltia.
Ndeshja e kthimit është të martën e ardhshme në “Fadil Vokrri” nga ora 20:00.
Drita është bërë skuadra e parë kosovare që ka arritur në fazën e dytë kualifikuese të Championsit. Nëse eliminohet në këtë raund garash, vazhdon në raundin e tretë të Ligës së Evropës.