Një anëtar i tifo-grupit “Intelektualët” në përkrahje të kampiones Dritës, i ka kushtuar me 500 euro gjobë “stërpikja me birrë” gjatë ndeshjes derbi ndërmjet Llapit dhe Dritës e zhvilluar të hënën në stadiumin “Zahir Pajaziti” në Podujevë. Kështu të paktën pretendojnë “Intelektualët”.
Tifo-grupi i klubit Drita shkruan se edhe një anëtar i dytë i tyre është dënuar me 500 euro.
“E paprecedentë dhe e patolerueshme, sjellja vulgare dhe mafioze, dje nga policia e Kosovës në Podujevë! Keni parë ju raste, ku dikush dënohet në shifra 500 euro, vetëm se në momente pasioni dhe feste, zgjedh të stërpik me birrë shokët e vëllezërit e tij në tribinë?! As ne nuk e besonim, se ka shkuar deri këtu pafytyrësia e uniformave policore, por ja që dje ishim dëshmitarë, ku 2 nga anëtarët tanë u dënuan me nga 500 euro. Njëri veç pse stërpiku me birrë e tjetri vetëm pse reagoi në momentet kur policët iu vërsulën antarit tonë. Në fakt, reaguam të gjithë, ku si pasojë e konflikteve me polici, edhe kopi mbeti i boshatisur në minutat e fundit të ndeshjes”, shkruan ndër të tjera në reagimin e tifo-grupit “Intelektualët 1998”. Ky grup në faqen në facebook, ka ilustruar me fotografi dënimin me 500 euro të anëtarit të tyre.
