Arijanet Muric ka pasur një vit të jashtëzakonshëm sezonin e kaluar si në aspektin personal ashtu edhe në atë ekipor.
Portieri i Kombëtares së Kosovës ka qenë ndër më të rëndësishmit që Burnley u bë kampion në Chapionship dhe u rikthye në elitën e futbollit anglez Ligën Premier.
Por përkundër se ai pati paraqitje spektakolare sezonin e kaluar, skuadra angleze e transferoi portierin e ri James Trafford për t’i besuar fanellën e titullarit.
Edhe nga tifozët e Burnleyt është vlerësuar si një padrejtësi, pasi Aro ka merituar ta ketë rastin në Ligën Premier përderisa paraqitjet e tij ishin të jashtëzakonshme në Championship, por edhe në ndeshjet miqësore.
Reprezentuesi kosovar ka mbetur në bankën rezervë në dy ndeshjet e para të Burnleyt në Ligën Premier dhe padrejtësia që i është bërë Aro Muric po i kushton skuadrës së udhëhequr nga Vincent Kompany.
Në dy sfidat e para, Burnley ka pësuar dy humbje 0-3 nga Manchester City dhe 1-3 nga Aston Villa, duke pësuar gjashtë gola.
Trafford ka zhgënjyer me paraqitjet e tij, duke qenë në të dy sfidat futbollisti me notën më të ulët në ndeshje nga radhët e Burnleyt.