Trajneri i Dritës, Ardian Nuhiu ka folur në një konferencë për media në prag të derbit të javës së 12-të kundër Prishtinës.
Drita dhe Prishtina do të përballen të mërkurën në Gjilan me fillim nga ora 13:00 në stadiumin me bari sintetik.
Tekniku shkupjan u shpreh se skuadra e tij është gati për Prishtinën, duke vlerësuar kundërshtarin.
Ai shtoi se nesër do të ketë një klasike të vërtetë të futbollit.
“Kishim vetëm tri ditë për të përgatitur ndeshjen. Jemi munduar që të rikuperojmë forcat dhe të përgatitemi për ndeshjen e nesërme. Kundërshtarin e njohim. Nesër kam besim të plotë se do të jetë një klasike e vërtetë. Futboll shumë kualitativ. Gjithmonë i referohem kualitetit të futbollistëve si te Drita ashtu edhe te Prishtina. Skuadra ime është komplet e fokusuar. Duhet të jemi të disiplinuar. Nuk do të jetë aspak e lehtë ta mposhtim Prishtinën. Përballemi me një skuadër që ka cilësi”, ka thënë Ardian Nuhiu në konferencë për media, raporton Demokracia.com.
Drita është në vendin e parë me 27 pikë. Prishtina zë pozitën e katërt me 15 pikë të grumbulluara.