Romelu Lukaku ka folur hapur për transferimin e tij të diskutueshëm te Manchester United në vitin 2017, duke pranuar se në fillim nuk donte t’i bashkohej klubit për shkak të interesit të fortë nga Chelsea.
Sulmuesi, i cili u transferua nga Everton te Man United për një shumë të raportuar prej 75 milionë funtesh, zbuloi se një telefonatë nga trajneri i atëhershëm, Jose Mourinho, ndryshoi rrjedhën e transferimit të tij.
“Ua kisha thënë të gjithëve: Do të shkoj te Chelsea. Por papritmas Mourinho më telefonoi për të më thënë se Manchester United kishte bërë një ofertë”.
“U ktheva nga pushimet dhe papritmas u arrit një marrëveshje me Evertonin. I thashë Minos [Raiola, agjentit tim pas transferimit]: ‘Nuk e doja këtë’, dhe pastaj vendosa që tani po bëj gjithçka vetë”, shtoi ai duke treguar se u largua nga agjenti i njohur.
Gjatë dy sezoneve te “Old Trafford”, Lukaku shënoi 42 gola në 96 paraqitje dhe dha 12 asiste.
Megjithatë, koha e tij te Man United u karakterizua nga suksese të përziera, pasi klubi luftoi nën drejtimin e trajnerëve Mourinho dhe Ole Gunnar Solskjaer.
Lukaku u rikthye te Chelsea në vitin 2021 pas një periudhe të suksesshme te Interi, por që atëherë ka gjetur një jetë të re te Napoli.
Sezonin e kaluar, ai shënoi 14 gola dhe luajti një rol të rëndësishëm në triumfin e Napolit në Serie A.