Futbollistet e Kosovës e fituan 1:0 ndeshjen e parë miqësore kundër Estonisë më 28 qershor. Por të martën “Dardanet” barazuan 2:2 në ndeshjen e dytë miqësore kundër estonezeve në stadiumin “Kadrioru” në Talin.
Kosova e mbylli me epërsi 2:1 pjesën e parë.
Estonia kaloi në epërsi në minutën e 13-të, ndërsa në minutën e 30-të, Kaltrina Biqkaj shënoi për 1:1. Golin e epërsisë e shënoi kapitenia Erëleta Memeti. Ajo golin për 2:1 e shënoi në minutën e 41-të. Por estonezet me të nisur pjesa e dytë, saktësisht në minutën e 46-të barazuan shifrat në 2:2. Gola të tjera më nuk pati.
Ishin ndeshjet testuese para përballjeve me Turqinë në kuadër të plejofit të Ligës së Kombeve.
Paraqitjen në plejofin për kthim në Ligën B, Kosova e siguroi si e dyta në ranglistën e përgjithshme. Kosova e përfundoi Grupin 6 të Ligës C në vendin e dytë me shtatë pikë.