Skuadra e Malishevës ka njoftuar të hënën se ka depononuar ankesë në Federatën e Futbollit të Kosovës (FFK), kundër gjyqtarit Mervan Bejtullahu.
Bejtullahu ishte gjyqtar kryesor në humbjen e Malishevës 1:0 nga Dukagjini vikendin e fundit, ndërsa është akuzuar se qëllimisht ka dëmtuar ekipin mysafir. Malisheva ka insistuar se me referimin e tij skandaloz në Klinë, Bejtullahu po prish imazhin e FFK-së dhe po kriminalizon futbollin kosovar.
Po ashtu, Malisheva ka paralajmëruar se po planifikon ankesë edhe në organet disiplinore të UEFA-s, duke pasur parasysh se Bejtullahu bartë emblemën e këtij institucioni.
“Mervan Bejtullahu duhet të ndalet, jo për hirë të FC Malishevës, por për hirë të futbollit në përgjithësi. Ne jemi të vendosur që të ankohemi në çdo instancë të UEFA-s lidhur me skandalet e qëllimshme të Mervanit për gjatë tërë kampionatit, jo vetëm për ndeshjen e fundit. Jemi duke mbledhur dëshmi, argumente dhe videoincizime të cilat pasqyrojnë realisht veprimet e Mervan Bejtullahut gjatë referimeve te ndeshjeve dhe do të deponohen në UEFA”, ka shkruar Malisheva ndër të tjera në njoftimin e saj.