Barcelona më nuk është pa humbje në La Liga. Pas shtatë fitoreve rresht, Barça u mposht të shtunën nga Osasuna. Madje Osasuna e fitoi me rezultat të thellë, 4:2, ndeshjen që e luajti në shtëpi.
Që në pjesën e parë u bë e qartë që Barçën e pret natë e vështirë. Ante Budimir shënoi për 1:0 në të mirë të Osasunas në minutën e 18-të. Dhjetë minuta më pas, Bryan Zaragoza shënoi për 2:0.
Me këtë rezultat përfundoi pjesa e parë.
Në pjesën e dytë Barcelona nisi më mirë. Pau Victor shënoi për 2:1 në minutën e 53-të. Më pas lojtarët e Barcelonës vazhduan sulmet, por në momentin më të mirë të Barçës, Osasuna e shënoi golin e tretë.
Kroati Budimir siguroi penallti dhe e konkretizoi atë për 3:1 në minutën e 72-të.
Në minutën e 85-të supergol shënoi Abel Bretones, për 4:1. Gol edhe më të bukur shënoi supertalenti Lamine Yamal në minutën e 90-të për 4:2.
Barcelona është lidere e kampionatit spanjoll me 21 pikë.
Osasuna është në pjesën e epërme të klasifikimit me 14 pikë.