Gur themeli për rinovimin e stadiumit në Gjilan ishte vendosur në vitin 2017. Në bazë të projektit të vjetër, rinovimi është dashur të përfundonte më 23 tetor të vitit 2020. Punimet u ndërprenë në gusht të vitit 2022, kur Komuna e Gjilanit shkëputi kontratën me kompaninë e kontraktuar. Punimet janë ndërprerë pa u bërë shumë punë. Stadiumi në Gjilan ka mbetur veç projekt tash e disa vjet, pavarësisht premtimeve të shumta për ndërtimin e tij. Drita e Gjilani po i vuajnë pasojat më së shumti nga rinovimi i stadiumit që është ende në proces të prokurimit.
Por, në Gjilan mund të nisë një fushë tjetër dhe fusha ku Drita e Gjilani i luajnë ndeshjet të bëhen punë shtesë.
Kështu shkruan të enjten në njoftimin e Federatës së Futbollit të Kosovës pas takimit që pati i pari i shtëpisë së futbollit, Agim Ademi, me kryetarin e Komunës së Gjilanit, Alban Hyseni.
“Një nga temat e diskutimit ishte përmirësimi i infrastrukturës së stadiumit në të cilin aktualisht janë duke u zhvilluar ndeshjet në Gjilan, e që do të krijonte kushte më të mira si për klubet, ashtu edhe për tifozët, duke pasur parasysh se projekti i rindërtimit të stadiumit të qytetit në Gjilan është ende në proces të prokurimit. Po ashtu, Ademi e Hyseni biseduan për mundësinë e bashkëpunimit ndërmjet këtyre dy institucioneve për ndërtimin e një fushe të re, që do të shërbente për garat e klubeve dhe shkollave të këtij regjioni. U diskutua edhe rreth punimeve finale në mënyrë që SC Gjilani dhe FC Drita të zhvendosen në komplekset e tyre të reja sportive, të cilat tashmë janë në proces të ndërtimit.
Drita është një prej klubeve më të organizuara në Kosovë. Organizimi nuk ka munguar as te klubi i Gjilanit. Dy skuadrat, në mungesë të stadiumit, ndeshjet si vendës i kanë zhvilluar në fushën me bar sintetik në Gjilan, ndonëse u ishte premtuar se shumë shpejt do t’i zhvillonin ndeshjet në stadiumin kryesor të qytetit.
Në shtator të vitit të kaluar Ministria e Kulturës, Rinisë dhe Sportit kishte njoftuar se “stadiumi i Gjilanit po bëhet”. Megjithatë është bërë “histori” rinovimi i stadiumit në Gjilan. Për përfundim duhet pritur edhe disa vjet.
Rindërtimi i stadiumit në Gjilan është paraparë t’i kushtojë shtetit 15 milionë euro.
“Projekti përfundimtar i Stadiumit të Gjilanit, i cili mungonte, tash është hartuar dhe është i gatshëm për zbatim ndërsa buxheti i nevojshëm për financimin e zbatimit veçse është siguruar. Në marrëveshjen e sotme me kryetarin Alban Hyseni zotuam 15 milionë euro për ndërtimin e stadiumit. Procedurat e nevojshme për zbatimin e projektit do të fillojnë menjëherë dhe punimet në tërësi do të nisin sa më parë. Për shkeljet që janë gjetur në të kaluarën e këtij stadiumi, tanimë të kualifikuara si të tilla edhe nga Zyra Kombëtare e Auditimit, ndaj palëve të përfshira po përgatitet kallëzim penal”, kishte shkruar ministri Çeku.
Qindra miliona euro janë investuar në infrastrukturën sportive në Kosovë në dy dekadat e fundit. Por, ajo vazhdon të jetë larg gjendjes së duhur. Vetëm stadiumi “Fadil Vokrri” i plotëson të gjitha kriteret për t’u zhvilluar një ndeshje e Kosovës. Në proces të rinovimit janë stadiumi “Adem Jashari” në Mitrovicë, ai i Gjakovës e shumë të tjera. Sa u takon sporteve të tjera, shumica e aktiviteteve ndërkombëtare zhvillohen në palestrën e vogël të Pallatit të Rinisë në Prishtinë, që mezi plotëson kriteret minimale për ngjarje ndërkombëtare. Ndërkohë MKRS-ja njofton vazhdimisht për investime në objekte të ndryshme të sportit.