Paraelelisht me ndeshjet në Ligën e Kampionëve, u luajt një ndeshje shumë e bukur në Championshipin anglez mes Burnleyt dhe Norwichit, që u fitua nga vendësit 1:0. Gardiani “dardan”, Aro Muric, edhe një herë ishte protagonist.
Në një ndeshje të dominuar nga Burnley dhe me një atmosferë shumë të mirë, u shoqërua ndeshja kundër Norwichit. Thënë ndryshe, kjo ishte edhe ndeshja mes dy skuadrave që sezonin e kaluar ishin në Premierligë.
Gjithsesi, Burnley me meritë, sado me vështirësi, arriti të ngadhënjejë dhe t’i marrë tre pikët, falë golit të vetëm që nga pika e bardhë shënoi Rodriguez 82’.
Mirëpo tre pikëve Vincent Kompany nuk do të mund t’u gëzohej nëse nuk do të ishte përfaëqsuesi kosovar, Aro Muric.
Në minutën e 89-të, kur rezultati ishte 1:0 në të mirë të Burnleyt, Norwich kishte një mundësi të artë shënimi për t’i barazuar shifrat.
Mbrojtja fenomenale : https://streamja.com/embed/116e6
Sulmuesi i spikatur finlandez, Pukki, nuk ia doli që ta dërgojë topin në kuadrat, sepse atij iu bë pengesë Aro Muric me një pritje bravoroze.
Përfaqësuesi finlandez nga afro shtatë metra goditi duke u munduar të shënojë në këndin e djathtë të portës, por ishte Muric ai qe me një zgjatje elastike ia doli që ta devijojë topin.
Ky ishte momenti i dytë vendimtar në ndeshje, pas penalltisë që u shënua në minutën e 82-të.
Me këtë fitore Burnley shkon në kuotën e 32 pikëve, duke zënë vendin e parë. Tashmë rikthimi në Premierligë është objektivisht gjë e mundur.
Kompany ka arritur ta konsolidojë mjaft mirë ekipin, duke e bërë edhe më kërkues seç ishte më herët nën drejtimin disa-vjeçar të trajnerit anglez Dyche, ku shpesh përshkruhej si futboll monoton dhe tejet defansiv.
Sa i përket Aro Muricit kjo ishte ndeshja e pestë në kampionat që nuk pësoi gol.