Trajneri i Ferizajt, kroati Andrej Panadiq, i cili të shtunën ndaj Dritës e pësoi disfatën e tretë rresht që kur mori drejtimin e skuadrës, ka thënë se ka shumë gjëra për t’u përmirësuar.
Megjithatë, ai është shprehur optimist pas ndeshjes se fati do të kthehet kur Ferizajt do t’i duhet më së shumti. Ferizaj tashmë është shtatë ndeshje pa fitore. Fitorja e fundit ishte kundër Llapit, 2:1, në fillim të muajit shtator.
“Lojtarët kanë thënë se kanë pranuar shumë gola në fundin e ndeshjes. Kjo do të thotë se duhet të jemi të koncentruar deri në fund. Megjithatë, unë mendoj se ka shumë gjëra për t’u përmirësuar. Nëse luajmë siç kemi luajtur sot, ka optimizëm të madh. Mënyra se si kanë luajtur lojtarët taktikisht, është fenomenale. Fati do të na kthehet neve kur do të na duhet më së shumti”, deklaroi Panadiq.