Java e dytë e Superligës së Kosovës solli një duel mjaft interesant mes Ballkanit dhe Malishevës, që në fund u mbyll baras me rezultat 1-1 në Suharekë.
Malisheva ishte skuadra që e nisi më mirë ndeshjen. Pas disa tentimeve të hershme, në minutën e 16-të Ferati goditi me kokë nga afërsia, por topi u përplas në traversë, duke i shpëtuar vendasit nga një gol i sigurt.
Rastet e mysafirëve nuk munguan, derisa në fund të pjesës së parë u shpërblyen. Pas një aksioni të shpejtë, Malisheva shënoi dhe shkoi në pushim me epërsi 0-1 me golin e Altin Aliut.
Pjesa e dytë solli një Ballkan më të vendosur, që kërkonte të mos zhgënjente para tifozëve të vet. Pas disa tentimeve nga Bleart Tolaj dhe Marcel Ismajlgecit, barazimi erdhi në minutën e 62-të.
Pas një tollovie në zonë nga një goditje këndi, brazilini Giovanni përfitoi dhe dërgoi topin në rrjetë për 1-1.
Deri në fund të takimit, të dyja skuadrat patën raste për gol. Almir Kryeziu shpërtheu disa herë me shpejtësi dhe tentoi nga distanca, por pa sukses, ndërsa Ibishi i mysafirëve nuk shfrytëzoi rastet e mira në minutat shtesë.
Ndeshja u mbyll 1-1, një rezultat që nuk i kënaq plotësisht asnjërën skuadër. Ballkani mbetet ende pa fitore në këtë sezon pas dy xhirove të para, me dy barazime, ndërsa Malisheva merr pikën e parë, duke e regjistruar pas humbjes në javën hapëse.