Fituesi i Ligës së Kampionëve, Paris Saint-Germain, mposhti Real Madridin thellë 4:0 në gjysmëfinalen e dytë të Kupës së Botës për Klube. Kjo ndeshje u zhvillua në “MetLife Stadium” të mërkurën mbrëma.
Parisi e nisi furishëm ndeshjen duke krijuar epërsi 2:0 brenda nëntë minutave. Të dy golat parisienët i shënuan pas gabimeve të lojtarëve të ekipit spanjoll.
Golin e epërsisë 1:0 për PSG-në e shënoi Fabian Ruiz në minutën e gjashtë. Asituesi i golit të parë, Ousmane Dembele e shënoi golin e dytë në minutën e nëntë. PSG-ja nuk u ndal dhe shënoi edhe golin e tretë. Për 3:0 shënoi gol sërish Ruiz. Ai golin e tretë e realizoi në minutën e 24-t.
Golin për 4:0 e shënoi Goncalo Ramos në minutën e 87-të. Eliminimi i Realit shënon edhe fundin e Luka Modriqit te klubi mbretëror.
Në finale, PSG-ja do të përballet kundër Chelseat. Ndeshja do të luhet të dielën nga ora 21:00.