Saarbrueckeni ka vazhduar me befasi në Kupën e Gjermanisë. Pasi e eliminoi Bayern Munichun në raundin e dytë, Saarbrueckeni ka eliminuar edhe skuadrën tjetër të Bundesligës, Eintracht Frankfurtin.
Skuadra e kategorisë së tretë të futbollit gjerman fitoi 2:0 në shtëpi ndaj fitueses së Ligës së Evropës për edicionin 2021/22.
Në pjesën e parë vendësve iu anulua një gol në minutën e 20-të, ndërsa për 1:0 realizoi Kai Brunker, në minutën e 64-t.
Luca Kerber e shënoi golin e dytë në minutën e 79-të.
Nga minuta e 83-të, mysafirët luajtën me një lojtar më pak në fushë, pasi direkt me të kuq u ndëshkua sulmuesi Noel Futkeu.
Mesfushori shqiptar, Tim Civeja, ishte në bankën rezervë te Saarbrueckeni.