Tifozët janë përplasur me policinë në Buenos Aires të martën, pas një dite me festime të mëdha, ku u prit Përfaqësuesja e Argjentinës në futboll që e fitoi Kupën e Botës, raporton agjencia AP.
Përleshjet nisën pasi policia lëvizi për të arrestuar disa tifozë që ishin future brenda monumentit Obelisk.
Tifozët hodhën gurë dhe shishe xhami në drejtim të policisë, ndërsa policët u kundërpërgjigjën me plumba gome e me ujë.
Disa tifozë janë arrestuar.
Parada për të festuar kthimin e Argjentinës u ndërpre shkurt të martën, pasi miliona kishin dalë në rrugë, e kishin bllokuar rrugët, e autostradat, duke krijuar skena kaotike.
Madje disa tifozë u lënduan duke tentuar të hidheshin mbi autobusin e hapur me të cilin Përfaqësuesja e Argjentinës po kalonte nëpër qytet. Lojtarët e Argjentinës në fund u desh të largoheshin nga vendi me anë të helikopterit.