Presidenti i klubit rumun Cluj, Cristi Balaj, e ka komentuar disfatën nga Argesi.
Cluji të dielën në kuadër të xhiros së tretë u mposht në shtëpi nga Argesi me rezultatin 2:0. Te Cluji nga pjesa e dytë u paraqit Meriton Korenica. Lindon Emërllahu mungoi për shkak të lëndimit.
Pos Emërllahut te Cluji janë të lënduar edhe Simao Rocha, Karlo Muhar dhe Mohammed Kamara. Drilon Islami nuk po grumbullohet ende.
Balaj thotë se është e pamundur t’i zëvendësosh lojtarët që mungojnë për shkak të lëndimeve.
“Fatkeqësisht, Simao nuk do të kthehet, Muhar ka një këputje ligamenti, Emërllahu ka një dëmtim muskulor dhe Kamara ka një thyerje të kyçit të këmbës. Është e pamundur të zëvendësohen ata, nuk kemi mundësi më të mira”, deklaroi Balaj, shkruan të hënën “Digisport”.
Reprezentuesi i Kosovës, Emërllahu, u lëndua më 17 korrik në fitoren 3:0 të Clujit ndaj Paksit hungarez në ndeshjen që ishte e vlefshme për raundin e parë kualifikues të Ligës së Evropës.
Ai po vuan nga një lëndim muskulor në kofshën e këmbës së djathtë dhe pritet të jetë jashtë fushës prej tri deri në katër javë.