Presidenti ukrainas Volodymyr Zelenskiy i kërkoi FIFA-s t’i drejtohej audiencës në stadiumin Lusail dhe në mbarë botën me një mesazh paqeje përpara finales së Kupës së Botës të së dielës midis Argjentinës dhe Francës, por propozimi i tij u refuzua, transmeton Gazeta Sport.
Presidenti i FIFA-s, Gianni Infantino bëri thirrje për një armëpushim në Ukrainë gjatë Kupës së Botës, por fatkeqësisht nuk ndodhi.
CNN raportoi se bisedimet midis FIFA-s dhe Ukrainës janë ende në vazhdim. Zelenski dyshohet se ishte i gatshëm të dërgonte një mesazh përmes lidhjes video, por një propozim i tillë nuk u mbështet nga drejtuesit e Federatës Botërore të Futbollit.
Gjatë Kupës së Botës ekipet kombëtare nuk u lejuan të shfaqnin mesazhe politike dhe në fokus të publikut ishte shiriti i kapitenit me ngjyrat e ylberit që donin të mbanin kapitenët e disa kombëtareve evropiane. Në fund ata hoqën dorë nga kjo ide sepse FIFA i kërcënoi me masa disiplinore. /Gazeta Sport/