Prishtina e ka fituar derbin e xhiros së 15-të të elitës së futbollit kosovar.
Të hënën, në ndeshjen që u desh të luhej në fundjavë por që u shty për shkak të të reshurave të borës, Prishtina mposhti Dritën me rezultatin 1:0. Ky ballafaqim fillimisht ishte caktuar të luhej në “Kampin Nacional” të FFK-së në Hajvali, ndërsa të hënën u zhvendos në stadiumin “Sami Kelmendi” në Lipjan.
Ishte fitorja e parë e kryeqytetasve pas tri ndeshjeve, pas ecurisë prej një disfate e dy barazimeve.
Ndërkohë, Drita e pësoi disfatën e tretë të edicionit. Golin e fitores për Prishtinën e shënoi Jalen Blesa, në minutën e 74-t. Blesa ishte i saktë nga penalltia.
Prishtina që drejtohet nga trajneri Emmanuel Egbo tani ka 21 pikë në 15 ndeshje të luajtura, katër më pak se Drita që mbetet në pozitën e tretë, por që ka një ndeshje më pak të luajtur.
Lider është Ballkani me 35 pikë në 13 ndeshje. Llapi është i dyti me 28 pikë, pas 15 ballafaqimeve të luajtura.
Në fundjavë, Prishtina luan në udhëtim te Dukagjini, ndërsa Drita e pret Feronikelin 74.