Sigal Prishtina është kualifikuar në gjysmëfinale të Kupës së Kosovës në basketboll. Të mërkurën mbrëma në palestrën “Shani Nushi” në Gjakovë, në praninë e dhjetëra shikuesve, Prishtina e mposhti Proton Cable Prizrenin me rezultatin 108:90. Ishte kjo ndeshja e fundit e fazës çerekfinale.
Në gjysmëfinale, të enjten prej orës 20:00, Prishtina takohet me Bashkimin. Gjysmëfinalja e parë është mes Trepçës dhe Golden Eagle Yllit, ndërsa luhet nga ora 17:00.
Proton Cable Prizreni e fitoi çerekun e parë me rezultatin 26:17. Por kjo ishte e tëra nga kjo skuadër. Prishtina dominoi në tre çerekët tjerë për fitore me rezultat bindës.
Kapiteni Dardan Berisha udhëhoqi Prishtinën me 27 pikë, pesë kërcime e tri asistime. Derrick Ëilson i kishte 14 pikë, tetë asistime e pesë kërcime. Henrik Shirko kontribuoi me 15 pikë e katër kërcime.
Te Prizreni, Ty Cockfield i kishte 21 pikë e gjashtë asistime. Arti Hajdari i realizoi 23 pikë, ndërsa i kishte edhe tri kërcime. Urim Zenelaj ndeshjen e përfundoi me 13 pikë e tetë kërcime, por ka munguar kontributi nga lojtarët e tjerë.