Francezi Jean-Michel Cavalli nuk do të jetë më trajner i Prishtinës.
Lajmi është konfirmuar të shtunën, një ditë pasi u mposht nga Malisheva me rezultatin 1:0.
Ai ballafaqim u zhvillua në stadiumin “Liman Gegaj” në Malishevë, dhe i takoi xhiros së 27-të të Superligës.
Në 12 ndeshjet e fundit në Superligë, Prishtina e ka vetëm një fitore, shtatë barazime dhe katër humbje.
Por, Prishtina ka shkruar të shtunën se Cavalli largohet për arsye shëndetësore.
“Për shkak të gjendjes shëndetësore dhe pas një marrëveshjeje të përbashkët, FC Prishtina ka vendosur të ndërpresë bashkëpunimin me trajnerin Jean-Michel Cavalli. E falënderojmë trajnerin Cavalli për përkushtimin dhe kontributin e dhënë gjatë kohës së tij në klub, duke i uruar shëndet të plotë dhe shumë suksese në të ardhmen, si në aspektin personal ashtu edhe profesional. Merci, Mr. Cavalli!”, ka shkruar Prishtina.
Prishtina është e pesta në tabelën e Superligës me 35 pikë, aq sa ka edhe Ferizaj në vendin e gjashtë.